Wednesday 21 August 2013

တညင်းသီးကြိုက်ရင် ဘယ်လိုစားမလဲ

by ပိုပိုဇော်(သဘာဝအားအင်)August 21, 2013 at 5:20pm

မန်မာလူမျိုးတို့အကြိုက် ရိုးရာအစားအစာဖြစ်သော တညင်းသီးစားခြင်းမှာ အနောက်တိုင်းဆေးပညာရှင် ဆရာဝန်ကြီးများ လုံးဝလက်မခံသော အစား အစာဖြစ်သည်။ ကျောက်ကပ်နှင့်ဆီးလမ်းကြောင်းပိတ်ပြီး အသက် အန္တရာယ်ပြု နိုင်သော အစားအစာဖြစ်သည်။ များများစားမိ၍ ဆီးလမ်းကြောင်းပိတ်သွားသဖြင့် ခွဲစိတ်ခန်းဝင်ပြီး ဆီးချူရသူပင်ရှိသည်ဟု ဆိုသည်။ မြန်မာလူမျိုးတို့သည် တညင်းသီးကို အဘယ်ကြောင့်ကြိုက်ကြသနည်း ဟူမူ နှုတ်မြိန်သောအစားအစာဖြစ်၍ဟု ဆိုနိုင်သည်။

တညင်းသီး၏ထူးခြားသော အစွမ်းသတ္တိမှာ ခံတွင်းပျက်ပြီးစားချင်သောက်ချင်စိတ်မရှိသူတို့ကို စေးထန်းသော၊ ဖန်ပြီး စပ်သောအရသာတို့ဖြင့် လျှာပေါ်ရှိအရသာဖုများ ကို နိုးကြားစေပြီး စားချင် သောက်ချင်စိတ်ဖြစ်လာသောကြောင့်  ဖြစ်သည်။

တညင်းသီးစားပုံအမျိုးမျိုးရှိသည်။ ပြုတ်၍သော်လည်းကောင်း၊ မီးဖုတ်၍ သော်လည်းကောင်း၊ ဆားရည်စိမ်၍ သော်လည်း ကောင်း၊ အဖန်ဓာတ်နှင့် အစေး ဓာတ်ကုန်အောင်ပြုပြင်စားသုံးကြသည်။ ရှေးယခင်က မန္တလေးဈေးချိုတော် အလယ် ပေါက်တွင်ရောင်းသော တညင်းသီးအုန်းနို့ဆမ်းသည် နာမည်ကြီးသော ဈေးချို သရေစာဖြစ်ခဲ့ဖူးသည်။ ယခုထိလည်း ကျော်ကြားဆဲ ရောင်းကောင်းဆဲဖြစ်သည်။

Alternative Medicine ဟုခေါ်သော   ပေါင်းကူးဆေးပညာပါရဂူ ဒေါက်တာ ခင်မောင်လွင်၏ ဟောပြောချက်တွင် တညင်းသီးကိုဓာတ်ခွဲသုတေသန ပြုကြည့်သောအခါ လူကိုအကျိုးပြုသည့် မည်သည့်အာဟာရမျှမပါဝင်ဟုဆို သည်။ ၎င်းတွင်ပါဝင်သော ဖန်ချောင်းကဲ့သို့သော ကလာပ်စည်းများသည် ကျောက်ကပ် တွင် သွားပိတ်နိုင်သဖြင့်  အန္တရာယ်ရှိ သည်။ ကျောက်ကပ်ပျက်စီးစေနိုင်သည်။ စားသင့်သည့်အတိုင်းအတာမရှိ၊ လုံးဝမစားသင့်သောအသီးမျိုးဖြစ် သည်ဟု တင်ပြ ထားသည်။ သို့သော် မြစ်ဝကျွန်းပေါ်နှင့် ဧရာဝတီတိုင်းဒေသကြီးတို့မှလာသော တညင်းသီးကို မြန်မာတို့စားသုံးခဲ့သည်မှာ နှစ်ပေါင်း ၂၀၀ ကျော်ခဲ့ပြီဟုသိရသည်။

တညင်းသီးကြိုက်သူများအတွက် တင်ပြလိုသည်မှာ မြန်မာ့ရိုးရာဆေးပညာ ရှုထောင့်အရ စေးထန်းပျစ်ချွဲသော အာပေါ အာဗန္ဓရအစာဖြစ်သည်။ အာကာသ ကိုပျက်စေသဖြင့် အပေါက်အခေါင်းများကိုပိတ်စေနိုင်သောအစာ ဖြစ်သည်။ ထိုအစာကိုစားလျှင် အာကာသပွင့်စေသောအစာနှင့်တွဲဖက်စားသင့်သည်။

တညင်းသီးပြုတ်ကို တို့စရာအဖြစ်စားလျှင် အဖြေဓာတ်အဖြစ် ရှောက်ရွက် အနည်းအငယ်ကိုတို့စားပေးပါ။ ပိတ်သော အာကာသဓာတ်ကို ပြန်ပွင့်အောင် ကူညီပေးနိုင်သည်။ တညင်းသီးပြုတ်လျှင် သကြားအနည်း ငယ်နှင့် ရှောက်ရည် ညှစ် ထည့်ပြီးပြုတ်ပါ။ နူးလွယ်ပြီး အဖန်ဓာတ်။ အစေးဓာတ်လျော့နည်းစေသည်။ တညင်းသီးကို ရင့်သည့်အသီးရှောင်ပြီး နုသော အသီးများကို ထက်ခြမ်းခွဲပြီး ဖန်ပုလင်းတွင်ထည့်ပြီး ဆားရည်စိမ်ထားပါ။ အာကာသ ပိတ်ခြင်း၊ ကျောက်ကပ် တွင် အစေးဓာတ်ပိတ်ဆို့ခြင်းမှ ကာကွယ်နိုင်ပါသည်။ ထမင်းစားသောအခါ ကြိုက် တတ်၍ တညင်းသီးများများစားမိလျှင်ဖြစ်စေ  တညင်းသီးအုန်းနို့ဆမ်းစားမိလျှင် ဖြစ်စေ  စားပြီးပြီးချင်း သံပရာဖျော် ရည် တစ်ခွက်သောက်ပေးပါ။ အဆိပ်မတက် စေနိုင် သော အဖြေဓာတ်ဖြစ်ကြောင်း တင်ပြလိုက်ရပေသည်။

 (ကြည်လွင်မြင့်-မုဒြာ)
source >>>http://www.moi.gov.mm/npe:zg/news/20/08/2013/id-4891

No comments:

Post a Comment